«ҚазМұнайГаз» корпоративтік басқару кодексінің қағидаттары мен ережелерін сақтау / сақтамау туралы есеп

Бұл есеп Кодекстің 6‑тармағын орындау үшін дайындалған және ҚМГ‑ның Кодекстің қағидаттары мен ережелерін сақтағаны / сақтамағаны туралы ақпаратты қамтиды.

2023 жылдың қорытындысы бойынша мынадай аспектілерді ескеріп, ҚМГ жалпы алғанда Кодекстің ережелері мен қағидаттарына сәйкес келді:

1. ҚМГ Кодексінің 1‑бөлімінің 5‑тарауының 6‑тармағының 1) тармақшасына сәйкес «Директорлар кеңесінің төрағасы жалғыз акционердің шешімімен сайланады; Директорлар кеңесінің төрағасы Қор өкілдерінің арасынан сайланған жағдайда, Директорлар кеңесі тәуелсіз директорлар арасынан аға тәуелсіз директорды сайлайды» .

Есепті кезеңде ҚМГ‑да Кодекстің бұл талабы сақталмады. ҚМГ Акционерлерінің жалпы жиналысының 2023 жылғы 14 тамыздағы шешімімен (№4/2023 хаттама) ДК төрағасы болып ДК мүшесі – мажоритарлық акционердің өкілі (Қордың өкілі) сайланды; бұл ретте ДК тәуелсіз директорларының ішінен аға тәуелсіз директор сайланбады.

Сонымен қатар, Кодекстің көрсетілген талаптарын орындау үшін Жоспарда ДК тәуелсіз директорларының ішінен аға тәуелсіз директорды сайлау көзделген.

2. Кодекстің 2‑бөлімінің 1‑тарауының 2‑тармағына сәйкес Қор ұйымдары үшін активтердің оңтайлы құрылымын қамтамасыз ету ұсынылады. Холдингтік компанияда бас компания акционерлік қоғам нысанында құрылуы мүмкін. Қалған ұйымдарды жауапкершілігі шектеулі серіктестік нысанында құру ұсынылады. Акционерлік қоғам нысанында құрылған Ұйымдарда экономикалық, құқықтық және өзге де аспектілерді ескеріп және Қор тобының мүдделерін қамтамасыз етіп, жауапкершілігі шектеулі серіктестік нысанына қайта ұйымдастыру мүмкіндігін қарастыру ұсынылады. Жаңа Ұйымдарды құру кезінде жауапкершілігі шектеулі серіктестік артықшылықты ұйымдық‑құқықтық нысан болып табылады. Ұйымның акцияларын қор нарығында одан әрі сату жоспарланатын сияқты ерекше жағдайларда жаңа ұйымдарды акционерлік қоғам нысанында құруға жол беріледі».

Кодекстің осы талаптары ҚМГ‑да есепті кезеңде жалпы сақталды. ҚМГ активтер құрылымын оңтайландыру бойынша жоспарлы жұмыс жүргізіп жатыр. Жаңа заңды тұлғаларды құрған кезде ҚМГ оларды Кодексте ұсынылғандай жауапкершілігі шектеулі серіктестіктің ұйымдық‑құқықтық нысанында құруға артықшылық береді. 2023 жылы акционерлік қоғам нысанындағы заңды тұлғалар құрылмады, акционерлік қоғам нысанындағы бұрыннан бар заңды тұлғаларды жауапкершілігі шектеулі серіктестік нысанындағы заңды тұлғалар етіп қайта ұйымдастыру жүргізілмеді. Сонымен қатар, ҚМГ тобы активтерінің құрылымын оңтайландыру жұмысы бекітілген жоспарларға/бағдарламаларға* сәйкес жалғасатын боладыҚМГ тобындағы заңды тұлғаларды қысқарту жекешелендіру және дивестициялар бағдарламалары шеңберінде жүргізіледі. 2020 жылғы 29 желтоқсанда Қазақстан Республикасы Үкіметінің №908 қаулысымен Жекешелендірудің 2021-2025 жылдарға арналған кешенді жоспары бекітілді, оған ҚМГ тобының 51 компаниясы, оның ішінде ҚМГ IPO периметріне енген 22 компания енгізілді. 2023 жылғы 1 қарашада ДК шешімімен (№22/2023 хаттама, №7 мәселе) СЕА тізбесі бекітілді. Осы шешіммен Директорлар кеңесінің 2022 жылғы 11 қарашадағы шешімімен бекітілген СЕА тізбесінің күші жойылды. 2022 жылғы 2 ақпандағы №44 «Жекешелендірудің 2021-2025 жылдарға арналған кейбір мәселелері туралы» Қазақстан Республикасы Үкіметінің 2020 жылғы 29 желтоқсандағы №908 қаулысына өзгерістер мен толықтырулар енгізу туралы" 2022 жылғы 2 тамыздағы №523 nbsp;ҚРҮҚ-мен №44 ҚРҮК бекітілген негізгі өлшемшарттарды (қағидаттарды) ескеріп, 2020 жылғы 29 желтоқсандағы №908 nbsp;ҚРҮК бекітілген Жекешелендірудің 2021-2025 жылдарға арналған кешенді жоспарына өзгерістер мен толықтырулар енгізілді. Нәтижесінде ҚМГ компаниялар тобының бірқатар активтері №908 ҚРҮҚ-ға кірді..

3. ҚМГ Кодексінің 2‑бөлімінің 1‑тарауының 14‑тармағына сәйкес «Қор мен ұйымдардың Директорлар кеңестері іскерлік әдеп стандарттарын енгізуді және олардың сақталуын қамтамасыз етеді. Қордың және ұйымдардың барлық лауазымды тұлғалары мен қызметкерлері Іскерлік әдеп кодексімен танысу туралы өтінішке қол қойып, Кодекс туралы білімдерін үнемі растап отыруы тиіс. Қорда және ұйымдарда лауазымды адамдар мен қызметкерлерді Іскерлік әдеп кодексін, омбудсменнің рөлін және болжамды бұзушылықтар туралы хабарлау жүйесінің қолжетімділігін түсінуге бағытталған оқыту тұрақты негізде жүргізілуге тиіс».

Кодекстің осы талаптары 2023 жылғы 31 желтоқсандағы жағдай бойынша жалпы алғанда сақталды. ҚМГ бизнесті жүргізудің адалдығы мен ашықтығы қағидаттарын ұстанады және әріптестеріміз бен серіктестеріміздің осы қағидаттарды сақтауына ерекше назар аударады. Осы міндет шеңберінде ҚМГ‑да Іскерлік әдеп кодексі, Сыбайлас жемқорлыққа қарсы іс‑қимыл саясаты, Мүдделер қақтығысын реттеу саласындағы саясат, Контрагенттердің сенімділігін тексеру саясаты бекітілді.

Компания жыл сайын жаңадан қабылданған, сондай‑ақ жұмыс істеп жатқан қызметкерлерге Компания қызметкерлерінен күтілетін этикалық стандарттар мен міндеттемелер мен мінез‑құлықтарды сақтау тұрғысынан оқыту жүргізеді. Бұдан басқа, қызметкерлер Іскерлік әдеп кодексі мен Сыбайлас жемқорлыққа қарсы іс‑қимыл саласындағы саясатты сақтау бойынша міндеттемелерді жазбаша түрде қабылдайды. Бұл ретте ҚМГ компаниялар тобының бүкіл қызметкерлерінің Іскерлік әдеп кодексімен танысқаны туралы өтініштерге қол қою жұмысы жоспарлы түрде жүргізіледі.

Сонымен қатар, ҚМГ Комплаенс қызметі жыл сайын сыбайлас жемқорлыққа қарсы іс‑қимыл мәселелері бойынша оқыту жүргізеді. Мәлімет үшін, 2023 жылғы 28 қыркүйекте орта және жоғарғы буын басшылары үшін ҚР Сыбайлас жемқорлыққа қарсы іс‑қимыл агенттігі өкілінің қатысуымен «Сыбайлас жемқорлыққа қарсы тиімді іс‑қимыл» тақырыбына семинар өткізілді, ал 2023 жылғы 6 қарашада барлық қызметкерлер үшін «Мүдделер қақтығысы» тақырыбына оқыту курсы өткізілді. Бұл ретте, 2023 жылы Іскерлік әдеп кодексін білуге бағалау жүргізілмеген.

4. «Орнықты даму:

басқару жүйесіне;
даму стратегиясына;
тәуекелдерді басқаруды, жоспарлауды (ұзақ мерзімді (стратегия), орта мерзімді (5 жылдық даму жоспары) және қысқа мерзімді (жылдық бюджет) кезеңдерді), есептілікті, тәуекелдерді басқаруды, адами ресурстарды басқаруды, инвестицияларды, операциялық қызмет пен басқаларды қоса алғанда, негізгі процестерге, сондай‑ақ органдардан (акционерлердің жалпы жиналысы (жалғыз акционер), Директорлар кеңесі, атқарушы орган) бастап қарапайым қызметкерлерге дейін барлық деңгейлердегі шешім қабылдау процестеріне біріктірілуі тиіс.».

Кодекстің бұл талабы ҚМГ‑да есепті кезеңде жалпы сақталды. ДК шешімімен 2020 жылы Орнықты даму саласындағы басқару жүйесі бойынша нұсқаулық бекітілді, ол мүдделі тараптармен өзара іс‑қимыл процесін ұйымдастыруды, орнықты даму қағидаттарын түйінді процестер мен мониторингке біріктіруді, орнықты даму жөніндегі жыл сайынғы есептілікті дайындауды, орнықты даму, орнықты даму мәдениетін дамыту және қолдау саласындағы басым бағыттарды (бастамаларды) іске асыруды, тәуекелдерді анықтап, бағалауды, құжаттаманы басқаруды, орнықты даму саласындағы нәтижелілікті өлшеуді сипаттауды қамтиды. Сонымен қатар, орнықты дамуды негізгі процестерге интеграциялау жұмысы жалғасып жатыр.

5. Кодекстің 2‑бөлімінің 5‑тарауының 3‑тармағының 6) тармақшасына сәйкес «Директорлар кеңесінің мүшелері өздерінің функционалдық міндеттерін орындауы және өз қызметінде мынадай қағидаттарды ұстануы тиіс: 6) тиісті ақыл, шеберлік пен парасаттылық көрсетіп әрекет ету – Директорлар кеңесінің мүшелеріне заңнама, корпоративтік басқару, тәуекелдерді басқару, қаржы және аудит, орнықты даму, саланы және ұйым қызметінің ерекшеліктерін білу сияқты бағыттарды қоса алғанда, Директорлар кеңесінің құзыреттері және Директорлар кеңесі мен комитеттердегі өз міндеттерін орындау бөлігінде өз білімдерін тұрақты негізде арттыру ұсынылады; ұйым қызметінің өзекті мәселелерін түсіну мақсатында Директорлар кеңесінің мүшелері ұйымның негізгі объектілеріне үнемі барып қызметкерлермен кездесулер өткізуі тиіс»

Кодекстің бұл талабы ҚМГ‑да есепті кезеңде жалпы сақталды. ҚМГ Басқарма төрағасы компанияның негізгі объектілеріне үнемі барып отырды, бұл ретте ДК мүшелері тұтас құрамымен компанияның негізгі объектілеріне бармады.

Сонымен қатар, Кодекстің көрсетілген талаптарын орындау үшін Жоспарда ДК мүшелерінің ҚМГ негізгі объектілеріне барып, қызметкерлермен кездесулер өткізуі көзделген.

6. Кодекстің 2‑бөлімінің 5‑тарауының 6‑тармағына сәйкес «Директорлар кеңесінің мүшелерін іріктеу процесі ашық болуы және Қор (компаниялардың Директорлар кеңестеріне қатысты) мен ұйымның Директорлар кеңесі қатысуымен жүргізілуі тиіс.», «Бірнеше акционерлері бар ұйымдарда Директорлар кеңесінің мүшелерін және Директорлар кеңесінің төрағасын сайлау процесі «Акционерлік қоғамдар туралы» Қазақстан Республикасының Заңында және ұйымның жарғысында айқындалған тәртіппен жүзеге асырылады. Аталған ұйымдарда Директорлар кеңесінің құрамын, қажетті дағдылары мен құзыреттерін және Директорлар кеңесінің құрамына үміткерлерді айқындауға ұйымның Директорлар кеңесінің Тағайындаулар мен сыйақылар жөніндегі комитетін тарту ұсынылады.».

Кодекстің бұл талабы ҚМГ‑да есепті кезеңде жалпы сақталмады. 2023 жылы ДК құрамын жаңарту кезінде ДК де, ТСК да бұл процеске қатыспаған, бұл ретте Қордың ДК‑ні Қордың ДК мүшесі болып табылатын Қордың Басқарма төрағасы білдірді. Соған қарамастан, 2023 жылғы ДК қызметін өзін‑өзі бағалау арқылы бағалау нәтижелері бойынша ДК қызметін жетілдіру жөніндегі іс‑шаралардың бірі ретінде ҚМГ акционерлерінің жалпы жиналысында ДК мүшелерін іздеу, таңдау және іріктеу процесін регламенттейтін құжатты бекіту көзделген, ол басқалармен қатар:

ДК төрағасы мен ТСК төрағасының ДК мүшелігіне үміткерлерді іздеу және іріктеу процесіне белсенді қатысуын;
ДК мүшелігіне үміткерлерді іздеу және іріктеу процесінің ашықтығын;
ТСК‑да ДК мүшелігіне барлық үміткерлердің түйіндемесін қарауды;
ҚМГ акционерлерінің жалпы жиналысының қарауына ДК мүшелігіне ТСК мақұлдаған үміткерлерді ғана енгізуді қамтамасыз етуге мүмкіндік берер еді.

7. Кодекстің 2‑бөлімінің 5‑тарауының 6‑тармағына сәйкес «Бірде‑бір адам өзінің тағайындалуына, сайлануына және қайта сайлануына байланысты шешімдер қабылдауға қатыспауға тиіс.».

Кодекстің бұл талабы ҚМГ‑да есепті кезеңде жалпы сақталды. Бұл ретте, ҚМГ Акционерлерінің 2023 жылғы 27 маусымдағы жалпы жиналысында (№3/2023 хаттама) Е.М. Отыншиев ҚМГ мажоритарлық акционерінің – Қордың уәкілетті өкілі болды, онда, басқалармен қатар, өзін ДК құрамына сайлау мәселесі бойынша дауыс берді. Соған қарамастан, Қор өкілі Қор Басқармасы белгілеген ұстанымға сәйкес дауыс берді.

8. Кодекстің 2‑бөлімінің 5‑тарауының 10‑тармағына сәйкес «Ұйымның Директорлар кеңесінің мүшесіне сыйақы белгілеу Қор әзірлейтін әдіснамаға сәйкес жүзеге асырылады, бұл ретте ұйым үшін осы адамның Директорлар кеңесінің құрамына қатысуынан күтілетін оң нәтиже назарға алынуға тиіс. Бірнеше акционерлері бар ұйымдарда Директорлар кеңесінің мүшелеріне сыйақы берудің тиісті қағидалары Қордың әдіснамасы негізінде әзірленеді және акционерлердің жалпы жиналысымен бекітіледі».

Кодекстің осы талабы ҚМГ‑да есепті кезеңде жалпы сақталды, ДК мүшелеріне сыйақы ҚМГ Акционерлерінің жалпы жиналысының шешімімен айқындалды. Сонымен қатар, Кодекстің осы талабын орындау үшін Жоспарда Қордың әдіснамасы негізінде ДК мүшелеріне сыйақы берудің тиісті қағидаларын әзірлеу көзделген.

9. Кодекстің 2‑бөлімінің 5‑тарауының 11‑тармағына сәйкес «Комитеттер Директорлар кеңесінің отырысында қаралғанға дейін неғұрлым маңызды мәселелер шеңбері бойынша егжей‑тегжейлі талдау жүргізу және ұсынымдар әзірлеу үшін құрылады. Комитеттер қарайтын мәселелер бойынша түпкілікті шешімді Директорлар кеңесі қабылдайды.».

ҚМГ‑да Кодекстің бұл талабы ішінара сақталды. ДК отырысында қаралғанға дейін неғұрлым маңызды мәселелер шеңбері бойынша егжей‑тегжейлі талдау жүргізу және ұсынымдар әзірлеу үшін бұрын келесі ДК комитеттері құрылып, есепті кезеңде жұмыс істеді:

ДК Аудит жөніндегі комитеті;
ДК Стратегия және портфельді басқару жөніндегі комитеті;
ДК Тағайындаулар мен сыйақылар жөніндегі комитеті;
ДК Қауіпсіздік, еңбекті және қоршаған ортаны қорғау және орнықты даму комитеті.

Бұл ретте, олар бойынша түпкілікті шешімдерді КА қабылдайтын тәуекелдерді басқару және ішкі бақылау саласындағы мәселелерді қоспағанда, ДК Комитеттері қарайтын мәселелер бойынша түпкілікті шешімді тікелей ДК қабылдайды. Жоспарға сәйкес, ҚМГ Жарғысына тиісті өзгерістер енгізу туралы мәселе, аталған мәселелер бойынша шешімдерді ДК қабылдауы үшін АЖЖЖ күн тәртібіне енгізілген.

10. Кодекстің 2‑бөлімінің 5‑тарауының 12‑тармағына сәйкес «Директорлар кеңесінің отырыстарын өткізудің ұсынылатын жиілігі жылына 8‑12 отырысты құрайды.».

Кодекстің бұл талабы ҚМГ‑да есепті кезеңде жалпы сақталмады – 2023 жылы 14 жоспарлы отырыс жоспарланып, өткізілді. Сонымен қатар, кезектен тыс 10 отырыс өткізілді, бұл отырыстардың ұсынылатын жиілігінен 2 есе көп.

11. Кодекстің 2‑бөлімінің 5‑тарауының 12‑тармағына сәйкес «Директорлар кеңесінің отырыстарына материалдар, егер Жарғыда өзге мерзімдер белгіленбесе, кемінде күнтізбелік 7 күн бұрын, ал ұйымның Жарғысында айқындалатын неғұрлым маңызды мәселелер бойынша кемінде 15 жұмыс күні бұрын жіберіледі. Маңызды мәселелердің тізбесі даму стратегиясын, даму жоспарын, атқарушы органның басшысы мен мүшелері үшін уәждемелік ҚНК, жылдық есепті және басқа заңды тұлғаларды құруға қатысуды қамтиды, бірақ олармен шектелмейді. Директорлар кеңесі отырысының күн тәртібіне материалдар мерзімдерін кешіктіріп ұсынылған мәселелер енгізілмейді. Мерзімдері кешіктірілген мәселелер күн тәртібіне енгізілген жағдайда, Директорлар кеңесінің төрағасына осы қажеттіліктің толық негіздемесі ұсынылады».

Кодекстің бұл талабы есепті кезеңде жалпы сақталды. ДК отырыстарына материалдар алдын ала – кемінде 7 күнтізбелік күн бұрын, ал ҚМГ Жарғысында айқындалған неғұрлым маңызды мәселелер бойынша егер Жарғыда өзге мерзімдер белгіленбесе, кемінде 15 күнтізбелік күн бұрын жіберіледі. Бұл ретте, 2023 жылы мерзімдерін кешіктіріп материалдарды ұсыну және мәселені күн тәртібіне енгізу жағдайлары орын алды. Мұндай жағдайларда орындаушылар ҚМГ Басқарма төрағасының не оның орнындағы адамның қолы қойылған, осы қажеттіліктің толық негіздемелерімен бірге ДК отырысының күн тәртібіне қосымша мәселені енгізу туралы өтінішхат береді.

12. Кодекстің 2‑бөлімінің 5‑тарауының 12‑тармағына сәйкес «Директорлар кеңесіне бұрын қабылданған шешімдерге ревизия жүргізу ұсынылады. Шешімнің өзі де, оны қабылдау процесі де талдауға жатады. Директорлар кеңесі өз қызметін бағалауды жүргізген кезде бұрын қабылданған шешімдерге ревизия жүргізу ұсынылады.».

Кодекстің бұл талабы есепті кезеңде ҚМГ‑да жалпы сақталды. Бұрын қабылданған ДК шешімдерін ревизия үш жылда бір рет өткізілетін ДК қызметін сыртқы бағалау шеңберінде көзделген. Бұл ретте, есепті кезеңдегі жұмыс қорытындылары бойынша ДК қызметіне өзін‑өзі бағалау жүргізу барысында ДК шешімдеріне ревизия жүргізілмеді.

13. Кодекстің 2‑бөлімінің 5‑тарауының 14‑тармағына сәйкес «Директорлар кеңесінің, оның комитеттерінің және Директорлар кеңесі мүшелерінің қызметіне бағалау жүргізу процесі, мерзімдері мен тәртібі ұйымның ішкі құжаттарында нақты регламенттелуі тиіс. Директорлар кеңесінің төрағасы мен мүшелері бағалау жүргізу бойынша оқытудан өтуі тиіс.».

Есепті кезеңде ҚМГ‑да Кодекстің бұл талабы сақталмады. ДК, оның комитеттері мен ДК мүшелерінің қызметін бағалауды жүргізу процесі, мерзімдері мен тәртібі ДК‑нің 2018 жылғы 4 қазандағы шешімімен (№14/2018 хаттама, №19 мәселе) бекітілген ДК‑нің, ДК комитеттерінің, ДК төрағасының, мүшелерінің және ҚМГ корпоративтік хатшысының қызметін бағалау туралы ережемен регламенттелген. Алайда, 2023 жылы ДК төрағасы мен мүшелері бағалау жүргізу бойынша оқытудан өткен жоқ.

14. Кодекстің 2‑бөлімінің 6‑тарауының 3‑тармағына сәйкес «Тәуекелдерді басқару және ішкі бақылау функциясына жетекшілік ететін басшының тәуекел иесі болмауы ұсынылады, бұл оның тәуелсіздігі мен объективтілігін қамтамасыз етеді. Тәуекелдерді басқару және ішкі бақылау функцияларын экономикалық жоспарлауға, корпоративтік қаржыландыруға, қазынашылыққа, инвестициялық шешімдер қабылдауға байланысты функциялармен қоса атқаруға тыйым салынады. Егер елеулі мүдделер қақтығысы туындамаса, басқа функциялармен қоса атқаруға жол беріледі.».

Кодекстің бұл талабы есепті кезеңде ҚМГ‑да жалпы сақталды. ҚМГ‑ның қолданыстағы ұйымдық құрылымына сәйкес ТБжІБҚ Басқарма төрағасының стратегия, инвестициялар және бизнесті дамыту мәселелеріне жетекшілік ететін орынбасарына тікелей бағынады. ТБжІБҚ басшысы бірде‑бір тәуекелдің иесі болмайды және сәйкесінше мүдделер қақтығысы да болмайды. Бұдан басқа, ТБжІБҚ басшысының атқарушы орган жанындағы комитеттерге тәуекелдерді басқару жөніндегі құрылымдық бөлімшенің өкілі ретінде толыққанды дауыс беру құқығымен дербес және тәуелсіз қатысуы қамтамасыз етілді.

15. Кодекстің 2‑бөлімінің 6‑тарауының 4‑тармағына сәйкес «Директорлар кеңесі тәуекелге тәбеттің жалпы деңгейін және негізгі тәуекелдерге қатысты төзімділік деңгейлерін бекітуі тиіс, олар компанияның ішкі құжаттарымен бекітілуі тиіс.»

Есепті кезеңде ҚМГ‑да Кодекстің бұл талабы сақталмады. Тәуекел‑тәбет, Тәуекелдердің шоғырландырылған тіркелімі, тәуекелдер картасы және Тәуекелдерді басқару жөніндегі іс‑шаралар жоспары, сондай‑ақ тәуекелдерге төзімділік деңгейлері және ҚМГ негізгі тәуекел көрсеткіштерінің тіркелімі КА шешімімен бекітіледі.

Кодекстің осы талабын орындау үшін Жоспарда жоғарыда көрсетілген құжаттарды бекіту бойынша мәселелерді ДК құзыретіне енгізу мақсатында ҚМГ Жарғысына өзгерістер енгізу көзделген.

Қысқартулар:

АК — «ҚазМұнайГаз» ҰК АҚ Директорлар кеңесінің Аудит жөніндегі комитеті;

ТСК — «ҚазМұнайГаз» ҰК АҚ Директорлар кеңесінің Тағайындаулар мен сыйақылар жөніндегі комитеті;

ҚМГ — «ҚазМұнайГаз» ҰК АҚ;

Кодекс — «Самұрық‑Қазына» АҚ Басқармасының 2015 жылғы 27 мамырдағы № 22/15 шешімімен бекітілген «ҚазМұнайГаз» ҰК АҚ Корпоративтік басқару кодексі;

СЕА тізбесі — ҚМГ стратегиялық емес активтерінің тізбесі;

Жоспар — «ҚазМұнайГаз» ҰК АҚ Корпоративтік басқаруды жетілдіру жөніндегі 2024‑2025 жылдарға арналған іс‑шаралар жоспары;

ҚРҮҚ — Қазақстан Республикасы Үкіметінің қаулысы;

ДК — «ҚазМұнайГаз» ҰК АҚ Директорлар кеңесі;

ТБжІБҚ — «ҚазМұнайГаз» ҰК АҚ тәуекелдерді басқару және ішкі бақылау қызметі;

Қор — «Самұрық‑Қазына» АҚ;

АЖЖЖ — ҚМГ Акционерлерінің жылдық жалпы жиналысы.